ऐंग्ये मुखणीं म मौल्यार

राजेश ध्यानी “सागर”

ऐंग्ये मुखणीं म मौल्यार
हथ खुट्यूं म निखार
रीति ज़िकुणीं म मिठास ,
बोल स्वांणा टपकणा छन
डांडी काट्यूं गाण धार
ऐंग्ये मुखणीं म मौल्यार ..

गिचीं म छन गीत भौंर्या
उठणीं सुर मिल़ाणीं च
दतुणीं इनी ठोकणींताल़ ,
ज़िबणीं छन्द पटाणीं च
गौंअ म सुणदरौं कि डार
लणैं हूंदी आर पार
बोल़ स्वाणां टपकणा छन
डांडी काठ्यूं गांण धार
ऐंग्ये मुखणीं म…..

गल़ौण्यूं माया बसन्तीं
म्वांरि बसन्ती भिन भिनभिनणीं च ,
अद् खुल्यूं पिल़ तैं देखीं
छुच्यौं सकसकाणीं च
कब ज़ोल़ू सींक क पार
कैंरीं द्यूल़ु शरमशार
बोंल़ स्वांणा टपकणा छन
डाडी काठ्यूं गांण धार
ऐं ग्यें मुखणीं ..

टिकुल़ि बिदुंल़ी सज म ऐंगीं
ल़टुल़ी फरफराणीं च
ज्वनि भ्वरीं ठसाठस
कखर्ल़यूं भिज़ाणीं च
जूनी खैं ग्यें इनि खांर
ल़ुकणीं च बार बार
बोल़ स्वांणा टपकणा छन
डांडी काट्यूं गाण धार
ऐंग्ये मुखणीं म मौल्यार…

¤  प्रकाशन परिचय  ¤

	From » राजेश ध्यानी “सागर” वरिष्ठ पत्रकार, कवि एवं लेखक Address » 144, लूनिया मोहल्ला, देहरादून (उत्तराखण्ड) | सचलभाष एवं व्हाट्सअप : 9837734449 Publisher » देवभूमि समाचार, देहरादून (उत्तराखण्ड)